Toshkent gumanitar fanlar universiteti Kengashining navbatdagi 2-sonli majlisi bo‘lib o‘tdi


Ta’lim sifati, kadrlar salohiyati va raqamli transformatsiya masalalari muhokama markazida

Toshkent gumanitar fanlar universitetida oliygoh rahbariyati, Kengash a’zolari hamda professor-o‘qituvchilar ishtirokida joriy o‘quv yilidagi muhim strategik vazifalarga bag‘ishlangan navbatdagi 2-sonli majlis yuqori saviyada tashkil etildi. Yig‘ilishni ochib bergan universitet rahbariyati oliygoh oldida turgan eng dolzarb masalalarga to‘xtalib, ta’lim sifatini oshirish va xalqaro standartlarni joriy etish bosh maqsad ekanligini alohida ta’kidladi.

Qonun ustuvorligi va ijro intizomi

Yig‘ilish kun tartibidagi birinchi masala sifatida O‘zbekiston Respublikasining qonunlari, O‘zbekiston Respublikasi Prezidenti farmon va qarorlari, O‘zbekiston Respublikasi Vazirlar Mahkamasining normativ-huquqiy hujjatlari hamda Oliy ta’lim, fan va innovatsiyalar vazirligi Hay’at qarorlarining universitet faoliyatidagi ijro holati atroflicha tahlil qilindi. Belgilangan topshiriqlarning o‘z vaqtida va sifatli bajarilishi universitet boshqaruv tizimining samaradorligini ta’minlashda bosh mezon ekanligi qayd etildi.

Kadrlar salohiyatini oshirish: yangi tayinlovlar

Universitetning ilmiy salohiyatini mustahkamlash hamda professor-o‘qituvchilarning pedagogik va ilmiy faoliyatini munosib rag‘batlantirish maqsadida kadrlar masalasiga alohida e’tibor qaratildi. Majlisda PhD ilmiy darajasiga ega, dotsent lavozimidagi o‘qituvchilarni professor vazifasini bajaruvchi lavozimiga o‘tkazish to‘g‘risidagi masala ko‘rib chiqildi va bir ovozdan ma’qullandi. Ushbu o‘zgarish oliygoh akademik va ilmiy muhitini yangi bosqichga olib chiqishga xizmat qilishi ta’kidlandi.

Axborot-resurs markazi faoliyatida yangi davr

Talabalarga zamonaviy ta’lim sharoitlarini yaratish va o‘quv jarayonini adabiyotlar bilan to‘liq ta’minlash maqsadida universitet kutubxonasi faoliyatini tubdan takomillashtirish bo‘yicha quyidagi muhim yo‘nalishlar tasdiqlandi:

– kutubxona fondini yangilash: zamonaviy xalqaro va milliy o‘quv hamda ilmiy adabiyotlarni tizimli xarid qilish orqali fondni muntazam boyitib borish.

– raqamli kutubxona tizimi: onlayn kutubxona xizmatlarini kengaytirish va masofaviy foydalanish imkoniyatini yaratish.

– talaba-yoshlar orasida kitobxonlikni keng targ‘ib qilish.

Kelgusi rejalar va ijro nazorati

Majlis yakunida muhokama qilingan barcha masalalar yuzasidan Kengashning tegishli qarorlari qabul qilindi. Fakultet va kafedra rahbarlariga, tuzilma mas’ullariga o‘quv dasturlari sifatini doimiy nazorat qilib borish va HEMIS tizimini unumli yuritish bo‘yicha aniq vazifalar yuklatildi.

Toshkent gumanitar fanlar universiteti ta’lim standartlarini yuksaltirish va jamiyat uchun yuqori malakali mutaxassis-kadrlar tayyorlash yo‘lidagi tizimli islohotlarni faol davom ettiradi.